Awal Mule Sebuah Cerite: Eko Indrayadi

Alhamdulilah, ahi ni pas malam minggu. Diwek'an ngado kance nak usek atau sekedar behusek rami-rami nyakah ciwek. Mumpung agi diwekan, alangke baiknye kalu aku nak betutur kudai mengenai riwayat atau sejarahnye kenape umak ngan bak ku dulu ngenjok aku name Eko Indrayadi. Mungkin bnyak yang salah man uji uhang kele. Tapi, ini sekedar perapalanku kian ngenai sejare nameku. Bukankah men uji mamang William Shakespear yang nulis buku Romeo ngan Juliet. Ape nian arti sebuah name? Tapi alangke baeknya amen kite tau arti name kite. sebab man uji Ustad Thabroni badaku belajah ngaji mwaktu kecek dulu, name tu doa: mimpi dan harapan jeme tue kite. Nah karena itulah malam ini aku nak mutar palak. Tapi kannye begiling. Kalu mabok, hehehe. Tapi ngape adaklah yang penting namenye usahe.

Eko uji jeme artinye satu. Anak nomer satu lebih tepatnye. Name ini memang name pasaran, name yang bise kance-kance temukan di seluruh lapisan masyarakat jeme kite. Ndai tukang bakso, mamang pecel lele, pelajar, mahasiswa, sampai ke anggota DPRD di dusunku ade pule yang namenye Eko. Tapi, ade yang unik. Jeme banyak yang mehase amen ade jeme namenye Eko pasti jeme jawe. Pas nian amen di dusunku tu ade name daerah namenye Talang Jawe. Amen uji ninekku dulu itu bada para pekerja pembuat Rel Kereta Api yang dulu di drop ndai Pulau Jawe alias diperbantukan untuk melakukan pembangunan di daerahku. Daerah itu termasuk wilayah padat dan banyak jemenye. same kian dengan bada huma puyangku di dusun baturaje atau di daerah Cemara bada huma ninekku.Nah, amen kamu nak tau behape name uhang Eko pacak lakukan survei di bada ini. Anggapan name Eko adalah hang Jawe memang lah terpatri dalam pemikiran jeme-jeme dimanepun berade. Di SMA pun, aku banyak dikatekan kance-kance anak uhang jawe. Oleh karene itu banyak yang pasti nyangke bak ngan umakku jeme jawe. Ngenjok nameku mak ini.

Tapi ketike tepaham dalam pikiran, ade makne lain kenape umak ngan bak ngenjok name ini. Memang beliau bedue kannye jeme Jawe. Bakku ndai OKI, tepatnye di dusun Kuang Lubuk Tunggal. Amen kamu uhang dek tau daerahnye, kamu pasti kenal jeme hebat cak Helmy Yahya ngan Tantowi Yahya atau kamu uhang kenal dengan Pak Hatta Rajasa yang mak ini ahi jadi Menteri Koordinator Perekonomian. Nah legale uhang ini asalnye same Kabupatennye ngan bada bakku lahir. Tapi dusun bakku ini maseh jauh masuk ke dalam ndai wilayah uhang-uhang tekenal itu. Due Yahya ndai Indralaye daerah yang mak ini ahi jadi ibu kabupaten Ogan Ilir, sedangkan Pak Hatta ndai daerah Kayu Agung yang jadi ibu kabupaten Ogan Komering Ilir. Tapi men kamu uhang bace sejarah administratif wilayah Sumatera Selatan, kedue daerah itu dulunye satu dengan name kabupaten Ogan Komering Ilir saje.

Amen kamu uhang tau mak mane sejarah hidup ndai bakku, mungkin kance-kance pacak setarakan ceritenye gok, kisah Andrea Hirata dalam novel Laskar Pelangi dan Sang Pemimpi, juge dengan cerite tokoh Alif dalam novel 5 Menara. Kele mungkin dalam sesi tersendiri aku bakal cerite mak mane kerasnye perjuangan bakku dulu ketike sekolah. Alangke malunye aku, men tau betape semangatnye die. Beda nian gok budak-budak jaman mak ini. Mungkin juge dek bise disetarakan gok pejuanganku saat ini.

Sedangkan umakku asli jeme Dusun Baturaje, amen uji jeme Jakarta tu Betawinye Baturaje. Huma puyangku pun masih sampai mak ini betegak di dusun tue baturaje. Parak gok sungai ugan. Aku maseh kurang tau jelasnye cerite sejarah turun-temurun ndai keluarge umakku. Tapi, men dekde salah keluarge umakku dulu ade yang namenye Pangeran Awaludin. N'tah siape kenan tu, tapi men ji umakku die jeme tekenal di Sumsel. Mungkin kance ade yang pacak sejarahnye. Selain tu, keluarge umakku juge mase beduluran gok Jenderal Makmun Murod. Mungkin amen kance-kannce lebih pacak gok anak beliau Dodi Makmun Murod. Nah, huma kenan tu sedepanan dengan huma puyangku di dusun Baturaje. Umakku ndai kecek besak di Baturaje, amen nganengkan ceritenye waktu aku kecek dulu. Baturaje tu la tekenal ndai jaman dulu. Nah, amen kamu kurang percaye cuka bukaklah blognye mang Joni Lodeh. Mamang kite sikok ini mungkin bise dikatekan Beny and Mice-nye uhang Baturaje. Legale sejarah Baturaje mamang kite ini pacak gale. Mungkin kele aku pacak milui jejak Soko Guru kite ini. Jadi budayawan suku Ogan lok almarhum Djohan Hanafiah. Semoga Allah senantiasa ngenjok tempat setimpal dengan pahale dan amal jariah beliau. Amien.

Kalau kite kinak, keluarge besakku rate-rate jadi Petani gale, memang ade yang jadi Pegawai Negeri. Tetapi, secare dek de langsung ade darah agraris yang berade dalam tubuhku. Memang, ninekku, puyangku, bak puyangku, atau ninek puyangku dulu aku dekde tau ige mak mane kise atau cerite beliau gale. Tapi yang jelas, karene mereka galelah aku pacak nginak dunie ini mak ini ahi.

Balek agi ke cerite awal, nah mungkin kamu uhang la tau sediket asal-muasal ndai jeme tueku, ngatek sedikitku hang jawe. Cuma ade cerite unik, waktu umakku ngandung aku dulu. Ade kemungkinan bak ngan umakku kepengen aku ini lok hang Jawe yang banyak merantau di dusunku. Rate-rate behasil gale dan jadi jeme sukses. Memang, hang Jawe tu men uji jeme kami pekerja ulet. Jarang nian tekinak jeme Jawe yang merantau gawinye behusek ngan ngerumpi kecuali men legale penggawiannye la selesai gale. Mpai uhang-uhang ini tekinak beselunjuhan melepas lelah di pucuk pance sambil ngudut rokok dan minum kopi.

Lalu, sambungan nameku yang selanjutnye Indrayadi. Nah, men sambungan ini caknye ade due arti. Cak ambigu men kite tela'ah. Banyak dosen-dosenku yang jeme Palembang nyangke Indrayadi tu, ndai kate Indralaya. Bada bakku dulu. Tapi, kalau kite kinak secare bahase Indrayadi itu semacam sinar atau cahaye. Mungkin bak ngan umakku secare dek de langsung dulu kepengen aku ini jadi budak yang bise jadi panutan jeme. Semacam tokoh. Amin. Tapi,Wallahu'alam. Ape kian artinye mudah-mudahan aku bise banggakan kedue uhang tueku. Adeng-adengku, gok keluargeku.

Nah, setelah bepanjang kalam gok kate. kamu uhang la tau kan mak mane asal-usulku, ngape nameku Eko Indrayadi tapi bukan uhang Jawe. Harapan kedue uhang tueku mungkin dekde terlalu muluk-muluk. Cukuplah aku jadi seorang pekerja keras lok hang Jawe, pintar lok mereka. Nirui jejak mereka yang merantau ke seluruh Indonesia. Mungkin cuma sampai sini kian cerite ndai aku ke kamu uhang. Mohon maaf kalu ade salah kate, karene kesempurnaan cuma milik Tuhan kite yang Maha Kuase.

Ciputat, 17 Maret 2012